Zaqatalada “Şahinlər” hərbi-idman oyunu üzrə yarışların rayon turu keçirilib

Zaqatalada keçirilən “Şahinlər” hərbi-idman oyunu üzrə yarışların rayon turu humanitar fənlər gimnaziyası komandasının qələbəsi ilə başa çatıb. Qalib komanda, eyni zamanda, yarışların apreldə Şəkidə keçiriləcək zona mərhələsinə vəsiqə qazanıb.

Yarışların ilkin seçim mərhələsinə rayonun ümumtəhsil məktəblərini təmsil edən 45 komanda qatılıb. Onların arasından seçilən ən yaxşı 8 komanda rayon turunun final mərhələsində iştirak etmək hüququ əldə edib. Final mərhələsinin yarışları Zaqatala şəhərindəki qədim tarixi-memarlıq abidəsi “Zaqatala qalası”nın ərazisindəki meydanda təşkil olunub. Tərkibinə 10 oğlan və 4 qız iştirakçının daxil olduğu komandalar sıra hazırlığı, silahın sökülüb yığılması, maneənin dəf edilməsi, hədəfə “qumbara” atma və digər yarışlarda bacarıqlarını nümayiş etdiriblər.

Rayon turunun qalibi olan humanitar fənlər gimnaziyasının komandası, həmçinin sonrakı yerləri tutan Aşağı Tala kənd 5 saylı və Yengiyan kənd tam orta məktəblərin komandaları fəxri fərmanlarla mükafatlandırılıblar.

Xatırladaq ki, Gənclər və İdman, Təhsil, Müdafiə nazirliklərinin, Səfərbərlik və Hərbi Xidmətə Çağırış üzrə Dövlət Xidmətinin birgə təşkilatçılığı ilə ənənəvi olaraq hər il keçirilən bu yarışlar gənc nəslin hərbi vətənpərvərlik tərbiyəsinə diqqət və qayğını daha da artırmaq, məktəb şagirdlərini hərbi-idman oyunlarına geniş cəlb etməklə, onların ordu sıralarında xidmətə hazırlanmasına kömək məqsədi daşıyır.