Sənayenin inkişafına dair proqramların icrası nəticəsində regionlarda sənayeləşmə prosesi geniş vüsət almışdır.
Azərbaycanda son illərdə rəqabətqabiliyyətli müasir sənaye sahələrinin yaradılması, sənayenin infrastruktur təminatının yaxşılaşdırılması sahəsində çoxsaylı layihələr icra edilmiş, yeni iş yerləri açılmış, ölkə sənayesi yeni inkişaf mərhələsinə qədəm qoymuşdur. Müasir istehsal infrastrukturuna malik sənaye parklarının yaradılması ölkədə sənaye sahələrinin inkişafının təmin edilməsini, habelə istehsal sahələrinin və onun innovasiya istiqamətinin inkişafını nəzərdə tutan dövlət siyasətinin reallaşdırılmasına yönəldilmişdir. Sənaye parklarının yaradılması, həmçinin ölkənin qeyri-neft sektorunun davamlı inkişafı, ölkə iqtisadiyyatının ixrac qabiliyyətinin artırılması baxımından xüsusilə əhəmiyyətlidir.
Sənayenin inkişafına dair proqramların icrası nəticəsində regionlarda sənayeləşmə prosesi geniş vüsət almışdır. Hazırda ölkəmizdə Sumqayıt Kimya Sənaye Parkı, Balaxanı, Mingəçevir və Pirallahı Sənaye Parkları fəaliyyət göstərməkdədir. Hər bir sənaye məhəlləsi 10-dan çox müəssisəni özündə birləşdirməklə, yeni iş yerlərinin açılmasına öz töhfəsini verir.
Azərbaycan Respublikasının Prezidenti İlham Əliyevin 2011-ci il 21 dekabr tarixli Fərmanı ilə yaradılmış Sumqayıt Kimya Sənaye parkının ərazisində neft-kimya və digər prioritet sənaye sahələri üzrə rəqabət qabiliyyətli məhsulların istehsalı və emalı müəssisələri fəaliyyət göstərir. 2015-ci ildə Sumqayıt Kimya Sənaye Parkının rezidentləri olan "Azertexnolayn" MMC-nin texniki avadanlıqlar zavodunun, 2018-ci ildə “SOCAR Polymer” MMC-nin Polipropilen istehsalı zavodunun və parkda yerləşən Ferroərintilər zavodunun, Siqaret fabrikinin və İnşaat Kimyəviləri Zavodunun, 2019-cu ildə Karbamid zavodunun və “SOCAR Polymer” MMC-nin Yüksək sıxlıqlı polietilen istehsalı zavodunun, 2020-ci il 6 aprel tarixində parkda yerləşən “Bakı Tekstil Fabriki” MMC tərəfindən yaradılan tibbi maska istehsalı müəssisəsinin açılışı olmuşdur. 14 sentyabr 2020-ci il tarixində isə Sumqayıt Kimya Sənaye Parkı” Məhdud Məsuliyyətli Cəmiyyətinin nəzdində Peşə Təhsil Mərkəzinin açılışı olmuş, Azərbaycan Respublikasının Prezidenti İlham Əliyev açılışda iştirak edərək mərkəzdə yaradılan şəraitlə tanış olmuşdur. Sənaye parkı ərazisində yaradılan peşə təhsili müəssisəsində tələbələrə dövrün tələbinə uyğun bacarıqlar və peşə vərdişləri aşılanacaqdır. Təlim-tədris prosesində iştirak edəcək mütəxəssislər elə parkın rezidentlərinin yüksəkixtisaslı işçilərindən olacaq, tələbələr də Sumqayıt Kimya Sənaye Parkının müəssisələrində təcrübə keçməklə, iş yeri əldə etmək imkanı qazanacaqlar.
Son illərdə Sumqayıtda bir çox müasir müəssisələr yaradılmış və Sumqayıt bu gün yüksək ekoloji standartlara cavab verən şəhərlərdən biridir. Sovet vaxtında ekoloji vəziyyəti o qədər də ürəkaçan olmayan Sumqayıt bu gün tamamilə abadlaşdırılmış, şəhərin ümumi inkişafı ilə bağlı çox böyük tədbirlər görülmüş və yeni infrastruktur layihələri icra edilmişdir.
Sumqayıt Kimya Sənaye Parkında məhsul istehsalı və ixrac istiqamətində müsbət dinamika mövcuddur. 2020-ci ilin ilk 6 ayı ərzində məhsul istehsalı ilə Sumqayıt Kimya Sənaye Parkının ölkə sənayesinin qeyri-neft sektorunda xüsusi çəkisi 9,3 faiz, ölkə üzrə qeyri-neft sənaye məhsullarının ixracında xüsusi çəkisi isə 20 faiz təşkil etmişdir. Hazırda Parkda fəaliyyət göstərən müəssisələrdə 5500-dən çox insan daimi işlə təmin olunmuşdur.
Açılış mərasimində Sumqayıtın potensialının daha da gücləndiyini qeyd edən cənab prezident bildirmişdir ki, “Bu il burada şüşə istehsalı zavodu da fəaliyyətə başlayacaqdır. Oraya da böyük investisiyalar qoyulub və daxili tələbatımızı təmin edəcəkdir. Baxmayaraq ki, indi tikinti sektoru pandemiyaya görə bir qədər tənəzzülə uğrayıb, amma o, bərpa edilir və ediləcək. Biz özümüzü yerli şüşələrlə təmin edəcəyik.”
“Daxili tələbat nə qədər mümkünsə, yerli məhsullar hesabına təmin edilməlidir” deyən cənab Prezident tədiyyə balansını müsbət səviyyədə saxlamaq üçün bizə keyfiyyətli ixracyönümlü məhsul istehsal edən, valyuta gətirən müəssisələrin lazım olduğunu, xaricdə yaşayan azərbaycanlı iş adamlarının Azərbaycana vəsait qoymalı olduqlarını bildirmiş, Sumqayıt Kimya Sənaye Parkının timsalında yeniləşən, güclənən Azərbaycanı gördüyünü xüsusi olaraq vurğulamışdır.
Qeyd edilənlər onu göstərir ki, indi ölkəmizdə böyük imkanlara malik istehsal müəssisələri, sənaye obyektləri mövcuddur. İqtisadi sferada islahatların davam etdirilməsi və həyata keçirilən digər tədbirlər sənayenin inkişafına müsbət təsir göstərməkdədir. Bu səbəbdən Azərbaycan dünyada həm də sənayenin inkişaf tempi baxımından seçilən dövlətlərdən biri kimi qəbul olunmaqdadır. Azərbaycan Prezidentinin müəyyənləşdirdiyi kursa uyğun olaraq reallaşdırılan sənayeləşmə siyasəti uğurla davam edir və bu sahədə yeni istiqamətlərin müəyyənləşdirilməsi şübhəsiz ki, ölkə iqtisadiyyatının ümumi inkişafına da mühüm töhfələr verir.
YAP Zaqatala rayon təşkilatı
Qadınlar şurasının sədri
Vəfa Süleymanova
